अभंगवारी- अबीर गुलाल

अभंगवारी - अधिक देखणे तरी

अधीक देखणें तरी निरंजन पाहाणें ।

योगराज विनवणें मना आलें वो माये ॥१॥

देहबळी देउनि साधिलें म्यां साधनीं ।

यानें समाधान मज जोडलें वो माये ॥२॥

अनंगपण फ़िटलें मायाछंदा सांठवलें ।

सकळ देखिलें आत्मस्वरुप वो माये ॥३॥

चंदन जे जेविं भरला अश्वत्थ फ़ुलला ।

तैसा म्यां देखिला निराकार वो माये ॥४॥

पुरे पुरे आतां प्रपंचा पाहाणें ।

निजानंदीं राहणें स्वरुपीं वो माये ॥५॥

ऐसा सागरु ।

रखुमादेविवरु विठ्ठलु निर्धारु ।

म्यां देखिला वो माये ॥६॥

अभंगवारी - अवघा रंग एक झाला

अवघा रंग एक झाला। रंगी रंगला श्रीरंग।। धृ ।।
मीतूपण गेले वाया।

पाहता पंढरीच्या राया।। 1 ।।
नाही भेदाचे ते काम। पळोनी गेले क्रोध काम।। 2 ।।
देही असोनी विदेही। सदा समाधिस्थ पाही।। 3 ।।
पाहते पाहणे गेले दूरी। म्हणे चोखिया ची महारी।। 4 ।।

अभंगवारी- अगा वैकुंठीच्या राया

अगा वैकुंठीच्या राया ।

अगा विठ्ठल सखया ॥१॥

अगा नारायणा ।

अगा वासुदेवनंदना ॥२॥

अगा पुंडलिक वरदा ।

अगा विष्णू तू गोविंदा ॥३॥

अगा रखुमाईच्या कांता ।

कान्होपात्रा राखी आता ॥४॥

अभंगवारी- देवा तुझा मी सोनार

देवा तुझा मी सोनार |

तुझे नामाचा व्यवहार || धृ ||

मन बुध्दीची चाकरी |

रामनाम सोने चोरी || १ ||

नरहरि सोनार हरीचा दास |

भजन करी रात्रंदिवस || २ ||

अभंगवारी- माझा भाव तुझे चरणी

माझा भाव तुझे चरणी |

तुझे रूप माझे नयनीं || धृ ||

सापडलो एकामेकां |

जन्मोजन्मी नोहे सुटका || १ ||

त्वां मोडिली माझी माया |

मी तो जडलो तुझिया पायां || २ ||

त्वां मज मोकविले विदेही |

मी तुज घातले हृदयीं || ३ ||

नामा म्हणे गा सुजाना |

सांग कोणे ठकविलें कोणा ? || ४ ||